وئام نبيل-صحافية متدربة

أكد النجم السابق لفريق الرجاء الرياضي عصام الراقي، لاعب نادي سطاد المغربي، أنه ساهم بمبلغ 2550 درهما، في مبادرة 6000 رجاوي لرفع المنع من الانتدابات، في ظل الأزمة المالية التي يمر بها الفريق الأخضر.

وعبر عصام الراقي في تصريح لموقع “ميد راديو”: “فكرة المساهمة بمبلغ رمزي عجباتني، وتعتبر الحل الأقرب باش نرفعو المنع، واللي عندو الإمكانيات يدير معانا اليد في اليد باش نقدرو نجيبو 3 الانتدابات مهمة اللي تنقد الفريق”.

وأضاف الراقي “ساهل نخرج حتى أنا كمحب ونحتج على الأشخاص اللي غلطو، ولكن حنا كنقلبو على الحل باش تخرج الفرقة من المشاكل المادية والنتائج السلبية، وحاليا ما يمكنش تحاسب شي واحد، حتى يسالي العام ونحطو النقط على الحروف”.

وتابع الرجاوي السابق “سوء التسيير بان فيه كل شخص على الحقيقة ديالو اللي مخبية تحت مسمى حب النادي، والنتائج هاهي بانت وكتخلص فيها الفرقة”، مشددا على أن “اللي غيور على الفريق بصح يجيب ناس اللي كتفهم فالكرة، ويحيد لينا العشوائية ديال اللي بان لينا نعطيوه يدير انتدابات وهو لا يفقه شيء في المجال الكروي، بغينا أشخاص عندهم نظرة كروية وتقنية، ويجيبو لعابة وازنين بقيمة واسم فريق كبير من حجم الرجاء الرياضي”.

وواصل الراقي حديثه بالقول:”حاليا هاد الشي ما خاصش يأثر علينا، ونقلبو على الحل اللي نقدو بيه الفريق، نبنيو هيكلة جديدة ونعرفو بلي هادي راه الراجا وممنوع تسير تحت عنوان العشوائية، حيت ملي وليتي كتشوف فريق عريق ما بينو وبين النزول للقسم الوطني الثاني فقط 3 نقاط، هادي را مهزلة وما كتشرفش الفريق ولا المسيريين وحتى المحيط اللي حنا فيه”.

وفي إجابته عن سؤال حول من المسؤول على الوضعية الحالية للفريق، قال الراقي “أنا ما كنحملش المسؤولية للدراري، أنا كنحاسب الشخص اللي جاب اللاعب ووقع معاه بمبلغ مالي ووافق على الشروط الخاصة به، حتى واحد من اللاعبين الموجودين فالفريق حاليا ما ضربك على يديك باش تشريه”.

كما وجه عصام الراقي رسالة للجماهير الرجاوية من أجل دعم ومساندة لاعبي الفريق، قائلا “الجمهور اللي كيشتم وسط المقابلة، اللاعب ما عمرو غادي يحقق النتائج المرجوة فهاد الظرفية، ساندو المجموعة نفسيا باش يكونو مزيانين، وأنا غادي نبقا ديما ندافع عليهم، حيت لو كان المحيط نقي بطبيعة الحال غادي يدير اللاعب ما فجهدو باش يكون فالمستوى”.

وزاد المتحدث ذاته “مستودع الملابس يلا كانت فيه المجموعة متماسكة راه غادي نشوفو فريق زوين، واخا تكون الإمكانيات قليلة ومحدودة، وعكس هاد الشي غادي يوقع واخا يكون الفريق كيتوفر على أبرز النجوم اللي أنجبت كرة القدم”.

وفي الختام، علق الراقي عن الشتم والسب الذي تعرض له اللاعب الرجاوي السابق محسن متولي من قبل جماهير الفريق الأخضر، قائلا “الطريقة باش تشتم لاعب كبير من طينة محسن متولي اللي عطى الكثير لفريق الرجاء، بيّن صورة خيبة على الجمهور، وأنا عجبني حيت ما دار حتى رد فعل، هو عارف الظرفية اللي كيمر بيها النادي والضغط ديال الجمهور، ومتولي ولد الدار، ترعرع وكتب الاسم ديالو مع الراجا، وكنتمنى بحال هاد المسائل الصبيانية ما تعاودش تكرر”.